काठमाडौं, असोज १५ – यातायात तथा भौतिक पूर्वाधार मन्त्री कुलमान घिसिङले तोकिएको दरभन्दा बढी भाडा असुल्ने व्यवसायीमाथि तुरुन्तै कारबाही हुने चेतावनी दिएका छन्।
चाडबाडको अवसरलाई नाफा कमाउने माध्यम नबनाउन आग्रह गर्दै उनले यात्रुहरूलाई पनि बढी भाडा असुलिएको वा टिकट कालोबजारी भएको खण्डमा तत्काल स्थानीय प्रशासन र सुरक्षाकर्मीलाई जानकारी दिन आग्रह गरे।
मन्त्री घिसिङले भने, “स्वीकृत भाडादरभन्दा बढी असुल्नु कानुनविपरीत कार्य हो। यस्तो गतिविधि गर्ने व्यवसायीमाथि कडाभन्दा कडा कारबाही हुन्छ।”
उनले यात्रुलाई अनावश्यक दुःख नदिन र चाडबाडलाई सहज बनाउन यातायात व्यवसायीहरूलाई जिम्मेवार बन्नु पर्नेमा जोड दिए।
सचिवालयद्वारा जारी प्रेस विज्ञप्तिमा भनिएको छ, “चाडबाडलाई अवसर बनाएर यात्रुलाई ठग्ने, टिकटमा कालोबजारी गर्ने वा अतिरिक्त भाडा असुल्ने कार्य तुरुन्तै बन्द गर्न निर्देशन दिइएको छ।”
