काठमाडौं । अमेरिकी राष्ट्रपति डोनाल्ड ट्रम्पले अमेरिका बाहिर उत्पादन भएका ब्रान्डेड औषधिहरूमा १०० प्रतिशत आयात कर लगाउने घोषणा गरेका छन्। नयाँ नीति आगामी अक्टोबर १, २०२५ देखि लागू हुने जनाइएको छ।
ट्रम्पले आफ्नो सामाजिक सञ्जाल ट्रुथ सोसलमार्फत जानकारी दिँदै औषधिसँगै किचन क्याबिनेटमा ५०, बाथरुम भ्यानिटीमा ५०, फर्निचरमा ३० र भारी ट्रकमा २५ प्रतिशत कर लगाइने बताए। उनले यो कदमले अमेरिकी उद्योगलाई अनुचित विदेशी प्रतिस्पर्धाबाट जोगाउने दाबी गरे।
‘अक्टोबर १, २०२५ देखि अमेरिकामा नबनेका सबै ब्रान्डेड वा पेटेन्ट औषधिहरूमा १००% कर लगाइनेछ,’ ट्रम्पले लेखे।
भारतमा प्रभाव
ग्लोबल ट्रेड रिसर्च इनिसिएटिभ (GTRI) का अनुसार भारतको औषधि निर्यात क्षेत्रमा यो निर्णयको असर पर्न सक्छ। भारतले हरेक वर्ष करिब १२.७ अर्ब डलर मूल्यका औषधि अमेरिकामा पठाउँछ। यद्यपि तीमध्ये अधिकांश जेनेरिक औषधि भए पनि डा. रेड्डीज, लुपिन र सन फार्मा जस्ता कम्पनीहरूले अमेरिकामा ब्रान्डेड औषधि पनि निर्यात गर्दै आएका छन्।
GTRI को विश्लेषण अनुसार, नयाँ करका कारण अमेरिकामा औषधिको मूल्य बढ्नेछ भने भारतीय कम्पनीहरूले काम गर्ने नाफाको मार्जिन झन् संकुचित हुनेछ। उत्तर अमेरिका भारतीय औषधि कम्पनीहरूको आम्दानीमा सबैभन्दा ठूलो हिस्सा दिने बजार भएकाले यसले दीर्घकालीन असर पार्न सक्ने बताइन्छ।
आयरल्याण्ड संकटमा?
ब्रान्डेड औषधि उत्पादन गर्ने प्रमुख केन्द्रमध्ये आयरल्याण्ड अग्रस्थानमा रहेको छ। जोनसन एण्ड जोनसन, फाइजर, मर्क, एब्भी र एली लिली जस्ता ठूला कम्पनीहरूको कारखाना त्यहाँ रहेका छन्। मर्कले विश्वमा सबैभन्दा धेरै बिक्री हुने क्यान्सर औषधि किट्रुडा आयरल्याण्डमै उत्पादन गर्छ भने एब्भीले बोटोक्स उत्पादन गर्दै आएको छ।
ट्रम्पले यसअघि आयरल्याण्डले अमेरिकी कम्पनीलाई कम कर दर देखाएर आकर्षित गरेको आरोप लगाउँदै आलोचना गर्दै आएका थिए। नयाँ कर नीतिले आयरल्याण्डका उद्योग र अमेरिकी बजारबीचको सम्बन्धमा पनि चुनौती थप्ने संकेत देखिएको छ।
