वीरगञ्ज। वीरगञ्ज महानगरपालिका छपकैयाबाट आज बिहान एक विशेष समारोहका बीच यस वर्षको हज यात्रा लागि जाने यात्रुहरूलाई भव्य रूपमा विदाई गरिएको छ। मुस्लिम समुदायको पवित्र धार्मिक यात्रा ‘हज’का लागि साउदी अरेबियातर्फ प्रस्थान गर्न लागेका तीर्थयात्रीहरूलाई स्थानीय समाज, धार्मिक अगुवा, राजनीतिक प्रतिनिधिहरू तथा आफन्तजनले शुभकामना दिँदै भावनात्मक रूपमा बिदाइ गरे।
कार्यक्रममा बोल्दै मौलानाहरु हजको धार्मिक महत्व र यो जीवनमा एकपटक अनिवार्य रुपमा पुरा गर्नुपर्ने इस्लामी कर्तव्यको बारेमा व्याख्या गर्दै यात्रुहरूको सुरक्षित यात्रा, स्वास्थ्य र इबादतको स्वीकारोक्तिको लागि दुआ गरे। उनीहरुले भने, “हज केवल शारीरिक यात्रा मात्र होइन, यो आत्मा र आस्थाको गहिरो यात्रा हो।”
यस वर्ष छपकैयाबाट धेरै जना हज यात्रीहरू साउदी अरेबिया जाँदै छन्, जसमा महिला र पुरुष दुवै सामेल छन्। सबै यात्रीहरूलाई स्थानीय मुस्लिम समुदायले परम्परागत पोशाकमा सजाएर, पुष्पमाला, खजुरा, र मिठाइ वितरण गर्दै विदाई गरे।
यात्रुहरूको टोली काठमाडौं हुँदै साउदी अरेबियाको मक्का-मदीना प्रस्थान गर्नेछ। हज यात्राको अवधिमा उनीहरूले इस्लाम धर्मका पाँचवटा मुख्य स्तम्भमध्ये एक ‘हज’ पुरा गर्दै विभिन्न धार्मिक विधिहरूमा सहभागी हुनेछन्।
विदाई समारोहको व्यवस्थापन स्थानीय मदरसा, मस्जिद समिति र मुस्लिम युवा समूहले संयोजन गरेका थिए। कार्यक्रमपश्चात यात्रुहरूलाई विशेष सवारी साधनमार्फत काठमाडौंका लागि पठाइएको छ।
