वीरगञ्जमा विगत १० वर्षदेखि सामाजिक सेवामा क्रियाशील संस्था ‘इम्प्रुभिङ वीरगञ्ज’ ले आफ्नो मानवीय सेवाको यात्रालाई अझ सशक्त बनाउने उद्देश्यसहित पुनः ‘रोटी बैंक’ परियोजना सुरु गरेको छ। ‘भोकमरी विरुद्धको आवाज’ भन्ने नाराका साथ अघि बढ्दै आएको यस संस्थाले शुक्रबार साँझ ८ बजे वीरगञ्जको माइस्थान मन्दिर परिसरबाट औपचारिक शुभारम्भ गर्दै अभियानलाई पुनर्जीवित गरेको हो।
संस्थाका पदाधिकारीहरू, स्वयंसेवकहरू तथा स्थानीय सामाजिक अभियन्ताहरूको उपस्थितिमा आयोजना गरिएको कार्यक्रममा गरिब, असहाय, बिपन्न तथा सडकमा आश्रित व्यक्तिहरूका लागि निःशुल्क खाना वितरण कार्यक्रम सुरु गरिएको हो।
संस्थाका अनुसार, ‘रोटी बैंक’ परियोजना दैनिक रूपमा सञ्चालन हुने गरी सञ्चालनमा ल्याइएको हो, जसअन्तर्गत दैनिक दर्जनौं व्यक्तिहरूलाई निःशुल्क र सुस्वादु भोजन उपलब्ध गराइनेछ। परियोजनामा सहभागिता जनाउने स्वेच्छिक व्यक्तिहरूले दैनिक वा साप्ताहिक रूपमा रोटी तथा अन्य खाद्यवस्तुहरू प्रदान गर्न सक्नेछन्।
“भोकले कसैको पनि आत्मा नरोओस्, यही हाम्रो उद्देश्य हो,” अध्यक्षले भने, “रोटी बैंक हाम्रो समुदायको लागि मात्रै होइन, यो मानवता र करुणाको प्रतीक हो।”
रोटी बैंक पुनः सुरु भएपछि स्थानीयबासी र व्यवसायिक घरानाहरूबाट सकारात्मक प्रतिक्रिया आउन थालेको छ। धेरैले स्वेच्छिक रूपमा सहयोग गर्ने इच्छा व्यक्त गरेका छन्। विभिन्न स्कूल, कलेज, संघसंस्थाहरूले पनि सहयोगको प्रस्ताव गरेका छन्।
‘इम्प्रुभिङ वीरगञ्ज’ संस्थाले आगामी दिनमा रोटी बैंकलाई अन्य स्थानहरूमा पनि विस्तार गर्ने योजना बनाएको छ। भोजन वितरणको मात्रामा वृद्धि गर्नुका साथै, खाना पकाउने स्थान, स्टोरिङ्ग प्रणाली र स्वच्छतामाथि विशेष ध्यान दिने बताइएको छ।
यस अभियानको पुनः सञ्चालनसँगै वीरगञ्जमा सामाजिक चेतना, सहकार्य र मानवीय भावनालाई अझ बलियो बनाउने विश्वास गरिएको छ।
