हरिहरपुरमा युवाहरुलाई खेलकुदतर्फ आकर्षित गर्दै उनीहरूको प्रतिभा उजागर गर्ने उद्देश्यले “हरिहरपुर प्रिमियर लिग (HPL)” सुरु गरिएको छ। युवा समाजसेवी सलमान अहमदको पहलमा आयोजना गरिएको उक्त प्रतियोगिताको उद्घाटन एक विशेष कार्यक्रमका बीच सम्पन्न भएको हो।
उद्घाटन कार्यक्रममा स्थानीय जनप्रतिनिधि, खेलप्रेमी तथा विभिन्न क्षेत्रका व्यक्तित्वहरूको उपस्थिति रहेको थियो। कार्यक्रममा बोल्दै आयोजक सलमान अहमदले खेलकुदले युवाहरूलाई अनुशासित, स्वस्थ र सकारात्मक मार्गतर्फ डोर्याउने विश्वास व्यक्त गरे। उनले आगामी दिनमा अझ व्यवस्थित र ठूलो स्तरमा प्रतियोगिता सञ्चालन गर्ने लक्ष्य समेत सुनाए।
प्रतियोगितामा विभिन्न टिमहरूको सहभागिता रहेको छ भने खेलहरू नकआउट प्रणालीमा सञ्चालन गरिने जनाइएको छ। उत्कृष्ट प्रदर्शन गर्ने टिम तथा खेलाडीलाई आकर्षक पुरस्कारको व्यवस्था गरिएको छ।
स्थानीय स्तरमै यस्तो प्रतियोगिता आयोजना भएपछि युवाहरूमा उत्साह थपिएको छ। सहभागी खेलाडीहरूले यस्ता कार्यक्रमले आफ्नो प्रतिभा देखाउने अवसर पाएको बताएका छन्। साथै, स्थानीय बासिन्दाहरूले पनि यस किसिमको पहलले समाजमा सकारात्मक सन्देश प्रवाह हुने विश्वास व्यक्त गरेका छन्।
आयोजक पक्षका अनुसार प्रतियोगिता केही दिनसम्म सञ्चालन हुने छ र फाइनल खेल विशेष कार्यक्रमका साथ सम्पन्न गरिनेछ।
