पर्सा — बढ्दो सवारी दुर्घटनालाई न्यूनीकरण गर्ने उद्देश्यले पोखरिया बजारका विभिन्न स्थानहरूमा ट्राफिक सचेतनामूलक बोर्ड राखिनुका साथै ट्राफिक सचेतना कार्यक्रम सञ्चालन गरिएको छ।
कार्यक्रमअन्तर्गत बजारका मुख्य चोक, विद्यालय आसपास तथा भीडभाड हुने स्थानहरूमा ट्राफिक नियमसम्बन्धी सन्देशयुक्त बोर्डहरू स्थापना गरिएको छ। ती बोर्डहरूमा सवारी चालक तथा पैदलयात्रीलाई लक्षित गर्दै गति नियन्त्रण, हेल्मेट तथा सिटबेल्टको अनिवार्य प्रयोग, लेन अनुशासन पालना र मदिरा सेवन गरी सवारी नचलाउनुपर्ने जस्ता महत्वपूर्ण सन्देशहरू समावेश गरिएका छन्।
साथै ट्राफिक प्रहरी र सम्बन्धित सरोकारवाला निकायको समन्वयमा सञ्चालन गरिएको सचेतना कार्यक्रममा सवारी चालक, विद्यार्थी तथा सर्वसाधारणलाई ट्राफिक नियमको महत्वबारे जानकारी दिइएको थियो। कार्यक्रममा नियम उल्लंघनका कारण हुन सक्ने दुर्घटना, मानवीय क्षति तथा आर्थिक नोक्सानीबारे विस्तृत रूपमा सचेत गराइएको थियो।
कार्यक्रममा बजरंग युवा समाज पोखरियाको आर्थिक सहयोग तथा इलाका प्रहरी कार्यालय पोखरियाको सहकार्य रहेको थियो।
कार्यक्रममा बजरंग युवा समाज पोखरियाका अध्यक्ष पवन गुप्ता, समाजसेवी अमिरका प्रसाद चौहान, इलाका प्रहरी कार्यालय पोखरियाका प्रमुख डी.एस.पी. दीपक पौडेल लगायत स्थानीय युवा तथा समाजसेवीहरूको उल्लेखनीय सहभागिता रहेको थियो।
स्थानीयवासीहरूले यस्ता सचेतनामूलक गतिविधिले समाजमा ट्राफिक अनुशासन बढ्ने र दुर्घटना न्यूनीकरणमा महत्वपूर्ण सहयोग पुग्ने विश्वास व्यक्त गरेका छन्। साथै, यस्ता कार्यक्रमलाई नियमित रूपमा सञ्चालन गर्नुपर्ने आवश्यकता समेत औंल्याइएको छ।
सम्बन्धित निकायले आगामी दिनमा पनि ट्राफिक सचेतना अभियानलाई निरन्तरता दिँदै सुरक्षित सडक व्यवस्थापनमा जोड दिने जनाएको छ।
